(Dërguar më: 30/01/09) Qendra e Studimeve sociale në Itali, Censis, ka bërë të ditur se Prokuroria e Romës ka hapur një hetim mbi një trafik të mundshëm të minorenëve nga Shqipëria drejt Italisë për të bërë transplante ilegale të organeve. Sipas kësaj qendre, një nga rastet më të fundit është hetimi në Shqipëri i Doktor Adelki Ippolito i Prokurorisë së Romës, për një trafik të mundshëm minorenesh.

ITALI- Prokuroria e Romës ka hapur një hetim mbi një trafik të mundshëm minorenësh nga Shqipëria drejt Italisë për të bërë transplantin ilegal të organeve. Lajmi është bërë i ditur nga (Qendra e Studimeve sociale) Censis e cila ka bërë publik një raport të vitit të kaluar mbi trafikun e qenieve njerëzore, me qëllim trafik organesh.
Sipas qendrës Censis, në Itali janë hapur disa hetime nga gjykata për disa raste shitjes minorësh, që dyshohet se janë të lidhura me trafikun ilegal të organeve, por këto hetime nuk cuan në zbulimin e provave konkrete. Në një nga rastet më të funditqë citohet nga kjo qendër është hetimi që Doktor Adelki Ippolito i Prokurorisë së Romës ka hapur në Shqipëri. Hetimi ka të bëjë me dyshimet për një trafik të mundshëm minorenësh, që dyshohej se ishin transferuar ilegalisht në Greqi dhe në Itali jo vetëm si vende tranzit, por edhe si destinacione finale ku bëheshin transplantet.
Mësohet se ky hetim është në një fazë të rëndësishme dhe hetuesit presin rezultate të rëndësishme.
Por është ndryshe, saktëson qendra italiane e Studimeve Sociale, rasti i tregtisë ilegale të organeve: “Ka prova të ndryshme të transplanteve të marra nga shtetasit italianë në vendet ku është bërë dhurimi i organeve”.
Në pjesën më të madhe të rasteve italianet kanë shkuar në Indi për të marrë një organ duke qenë se deri më 1994, në atë vend shitja e organeve ishte e ligjshme”. Përsa i përket rrjetit italian, kontrollet e parashikuara, mund të ofrojnë garanci të mjaftueshme për të penguar futjen e një organi me origjinë të paligjshme në rrjetin ligjor të transplanteve të mjekësisë publike, por “situata mund të jetë ndryshe në rastin në të cilin hipotizohet ekzistenca e një trafiku klandestin të zhvilluar në spitalet private, jozyrtarisht, ne spitale të pajisura me aparatura të mira dhe që nuk dihet se ekzistojnë nga Shërbimi Kombëtar Shëndetësor italian”.

(e.n/news24/balkanweb)

(Dërguar më: 01/02/09) Nga Genc Kondi
Zbulohet se një projekt i iniciuar nga Banka Botërore me qëllim mbrojtjen e zonave bregdetare shqiptare, duhet të jetë përdorur për të prishur në mënyrë përzgjedhëse pjesë të fshatit te Jales

TIRANE-Nje grup inspektorësh, të dërguar në Shqipëri nga selia e Bankës Botërore në Uashington, ka përfunduar hetimin lidhur me akuzat për korrupsion dhe mungesë të transparencës të zyrtarëve të BB-së me qendër në Tiranë. Sipas organit të rrjetit të gazetarisë investigative ballkanike (BIRN) në internet, “Balkanin sight.com”, një projekt i iniciuar nga Banka Botërore me qëllim mbrojtjen e zonave bregdetare shqiptare, duhet të jetë përdorur për të prishur në mënyrë përzgjedhëse pjesë të një fshati në jug të vendit, duke lënë shumë familje pa strehë. Gjatë investigimit të kryer nga gazetarët Besar Likmeta dhe Gjergj Erebara, atyre u ka rënë në dorë raporti i brendshëm i grupit të inspektorëve të Bankës Botërore.
Shkeljet
Sipas raportit, të cituar nga “Balkaninsight.com”, “projekti i Bankës Botërore ka kontribuar në prishjen e banesave informale, në kundërshtim me politikat e BB-së lidhur me mospërdorimin e forcës për të larguar banorët. Inspektorët nga Uashingtoni theksojnë se menaxhuesit e projektit kanë dëmtuar banorët vendorë në zonën ku implementohet projekti, madje kanë ndihmuar me pajisje e foto ajrore, si dhe kanë nxitur inspektoriatin vendor të ndërtimit të prishë banesat. Përveç mosrespektimit të politikave të BB-së gjatë zbatimit të projektit, inspektorët përmendin akuza për korrupsion dhe ankesa, se prishja e banesave në Jalë është pjesë e një skeme më të madhe për ta zhvilluar zonën si objekt turistik”, - vihet në dukje nga “Balkaninsight.com”.
Grupi investigativ gjithashtu akuzon drejtuesit e BB-së se kanë keqinterpretuar faktet dhe kanë penguar hetimet, duke mos lejuar aksesin në të dhëna, ndërkohë që vëren edhe një mungesë të pazakontë të ruajtjes së fakteve dhe regjistrimit të ngjarjeve kryesore nga ana e stafit. “Disa anëtarë të stafit të BB-së, si në qendër, ashtu edhe në terren, ishin ‘trajnuar’ që të jepnin informacion jokorrekt dhe të gabuar, - theksohet në raport.
- Madje, u konstatua edhe një rast kur një punonjës refuzoi të japë informacionin e kërkuar”, - thuhet më tej në raport.
Varfëria
“Banka Botërore është e angazhuar për të ulur sa të jetë e mundur nivelin e varfërisë në Shqipëri, duke kontribuar ekonomikisht dhe me asistencë profesionale panë shqiptare. Në rastin e prishjes së shumë shtëpive të banimit në zonën e Jalës, inspektorët theksojnë se kanë konstatuar që shumica e banorëve kishin investuar në ato banesa kursimet e gjithë jetës së tyre. Prishja e tyre nuk ishte shoqëruar me kompensimin në një farë mënyre, financiar apo fizik, duke i lënë ata pa asnjë mundësi jetese normale”, - theksohet në raport. Në të konstatohet se praktikat e përdorura në këtë rast nuk janë në përputhje me politikat strategjike të Bankës Botërore, si në Shqipëri, ashtu edhe në vende të tjera të botës ku ekzistojnë probleme të ngjashme.
Reagimi
Në një deklarim për “Balkan Insight”, Banka Botërore ka pranuar se janë bërë gabime në projekt dhe se BB-ja është e shqetësuar lidhur me to. “Banka po shqyrton veprimet e stafit të saj, dhe në rast se do të konstatohen shkelje, do të merren masat përkatëse”, - thuhet në përgjigje të interesimit të gazetarëve shqiptarë.
Gjithashtu, zyra e BB-së konfirmon se Bordi i Drejtorëve Ekzekutivë të BB-së do të mblidhet në mes të muajit shkurt të këtij viti për të marrë në shqyrtim raportin e grupit të inspektorëve, po ashtu si dhe objeksionet e përfaqësuesve të zyrës në Tiranë. Vetëm pas kësaj, dy raportet do të paraqiten në publik.
Projekti
Në fakt, ka qenë 15 shtatori i vitit 2007, që ishte shpallur nga Banka Botërore si afati i fundit për hartimin e Planit për Zhvillimin e Bregdetit Jugor, i cili mbulon zonën nga Orikumi deri në kufirin grek. Madje, brenda këtij afati, ndërkombëtarët kërkonin edhe miratimin e tij nga KRRTRSH-ja. Ky plan duhet të përfaqësojë instrumentin zyrtar të qeverisë shqiptare që do të udhëheqë zhvillimin e zonës. Por, institucioni shqiptar i ngarkuar me zbatimin e kësaj detyre dhe që drejtohet nga Jamarbër Malltezi, bashkëshort i Argitës, së bijës së Kryeministrit Sali Berisha, është prezantuar me shumë vonesë. Ndërkohë, në opinion kanë qarkulluar fjalë për projekte të tjera, të fshehta, për të përdorur njohuritë mbi zonat që lirohen nga ndërtimet për të kontraktuar, në rrugë personale, objekte turistike me kompani të huaja.
Projekti nuk është i ri. Në kuadrin e tij, në prill 2005 qeveria e atëhershme shqiptare vendosi të caktonte një moratorium deri në miratimin e Planit për Zhvillimin e Bregdetit Jugor në lidhje me lejet e ndërtimit dhe miratimin e studimeve pjesore të planifikimit urban për bregdetin jugor (p.sh. toka në zona rezidenciale dhe urbane jashtë zonave të urbanizuara dhe ku mund të kishte akses për shërbime). Sipas Bankës Botërore, në lidhje me zbatimin e këtij Plani, dhe në veçanti me zhvillimin e zonave turistike, për qeverinë do të ishte e udhës, që pas përfundimit të Planit të lartpërmendur, ajo të ndiqte një proces konkurrues dhe transparent, ku të ftohej sektori privat të kryente investime në bregdet sipas ligjit për Koncensionet. Por, akuzat aktuale hedhin hije dyshimi lidhur me bashkëpunime jokorrekte midis drejtuesve të BB-së në Shqipëri me zyrtarët shqiptarë, të caktuar nga qeveria dhe që kanë afërsi familjare me Kryeministrin.
Malltezi
“Në muajin mars 2007, dy javë para se të fillonte prishja e banesave, koordinatori Malltezi i dërgoi një letër kreut të policisë ndërtimore, ku i kërkonte prishjen e shtëpive pa leje në Jalë, së bashku me dy CD me fotografi ajrore, të bëra me financimet e projektit, ku tregoheshin shtëpitë që duhej të prisheshin”, - thekson “Balkan Insight”. Në median lokale u tha se procesi po kryhej për të hapur rrugë për ndërtimin e një fshati turistik. Sipas inspektorëve të BB-së, zyra e Bankës disa herë është bërë gati të publikojë një reagim lidhur me këto akuza, por nuk e ka publikuar atë, duke mos i mohuar.
Vetë Jamarbër Malltezi, i cili është kontaktuar nga “Balkan Insight”, ka hedhur poshtë akuzat, duke thënë se “artikujt e shkruar kanë qenë të paguar nga dikush”. Ndërkohë, ai mohon të ketë bërë gabime në punën e tij. Koordinatori shqiptar i projektit e cilëson si të pabazuar raportin e inspektorëve të BB-së dhe thotë se pret konkluzionin e shkurtit, kur edhe varianti i zyrës së BB-së në Tiranë do të merret në shqyrtim nga ana e Bordit të Drejtorëve në Uashington.

(d.b/GazetaShqiptare/BalkanWeb)

(Dërguar më: 30/01/09) Nga Tedi Blushi
Nje nga ish të përndjekurit e regjimit komunist akuzon kryeministrin Berisha se ka kërkuar “varjen e tij në litar” në gjyqin e vitit 1975. “Gazeta Shqiptare” riboton sot të plotë intervistën dhënë në 2002.

TIRANE-  Hysen Sheshori është një prej mijëra të përndjekurve të regjimit komunist. Por në ndryshim nga të tjerët, ai është një rast unikal. Është i tillë jo se ka përjetuar më shumë persekucion, dhimbje e tortura në krahasim me bashkëvuajtësit e vet. As sepse ka bërë më shumë burg se të tjerët. Madje as edhe për arsyen se i ka shpëtuar fatmirësisht dënimit me vdekje. Hysen Sheshori është një rast unikal për dëshminë tronditëse që jep. Ai akuzon direkt kryeministrin Sali Berisha, se ka qenë “një dëshmitar i rremë” në gjyqin e ngritur ndaj tij. “Ai u ndal para trupit gjykues dhe pas formaliteteve, me një theks malësori, me eufori, filloi të flasë para trupit gjykues duke treguar se si e kishte gjetur traktin që kishte përmbajtje të theksuar armiqësore, të cilin e tundte para trupit gjykues dhe sallës. ‘…Ky njeri është armik i betuar i partisë, prandaj duhet të varet në litar’, - tha ai duke bërtitur”, - rrëfen Sheshori në një intervistë dhënë në dhjetor të vitit 2002 për gazetën “Plaga”, organ i Shoqatës së ish-të Burgosurve Politikë të Shqipërisë. Pyetjes se kush ishte ky “dëshmitar i rremë”, ai i përgjigjet qetësisht se “ky njeri, i cili është një komunist pasionant e fanatik i pandreqshëm, që për me arrit në majat më të larta të hierarkisë së pushtetit komunist ka përdorur dhe traktin tim duke ndikuar drejtpërdrejtë në dënimin tim me vdekje, ishte Sali Ram Berisha”. Insistimit të gazetarit nëse, a është i bindur për këtë dëshmi tronditëse që jep, Sheshori me një ironi therëse i kthehet: “Unë mund t’ju them që asnjëherë nuk mund të harrohet bisha që të kafshon”. Intervistën e botuar në dhjetor të ’02-it tek “Plaga”, e çuditërisht të lënë në heshtje e pa shumë bujë për 7 vite me radhë, “Gazeta Shqiptare” po e riboton sot sërish.
Kalvari i vuajtjeve
Hysen Sheshori përbën një rast unikal në Shqipëri, e ndoshta dhe në tërë Europën Lindore, edhe për faktin se i vetëm për gjithë kohën e diktaturës ai ka shpërndarë 41.100 trakte në një periudhë 13-vjeçare, nga viti 1961-1974. Dhe për 13 vjet me radhë është ndjekur nga Sigurimi famëkeq i Shtetit, për ta arrestuar në vitin 1974 dhe për ta dënuar me vdekje në vitin 1975. Fatmirësisht atij më pas iu fal jeta dhe dënimi u kthye në 25 vjet burgim, nga të cilat bëri vetëm 17 vjet. “Sot duket se jam i gjallë, por kjo nuk do të thotë që jetoj”, - përfundon intervistën e tij Sheshori.
(s.gGazetaShqiptare/BalkanWeb)