Durrës, ç’betonohet plazhi i Currilave, shemben lokalet e “vipave” Printoje
Saturday, 05 July 2008
Inspektorati Kombëtar Ndërtimor, ka zbarkuar ditën e djeshme në plazhin e Currilave me qëllim kthimin e saj në identitet. Fadromat e Policisë Ndërtimore kanë nisur një aksion për prishjen e shtatë objekteve, përkatësisht lokale dhe restorante, të ndërtuara pa leje në zonën turistike të plazhit të Currilave. Aksioni i inspektoratit të policisë ndërtimore në plazhin e Currilave ka qenë i befasishëm, pasi ndërhyrja e inspektoratit ndërtimor të Durrësit nuk rezultoi me sukses, ndërsa bregdeti betonohej çdo ditë e më shumë.Gjithçka në këtë zonë filloi nga një largësi prej 2 deri në 5 m larg skarpatës së rrugës dhe që shtrihet nën kodrën e Durrësit, me vendosjen e kioskave apo lokaleve prej kashte dhe më pas në mënyrë graduale nisi shtrija dhe zgjerimi i sipërfaqes. Aksioni është mbështetur edhe nga policia e rendit, e cila ka marrë nën kontroll situatën për ruajtjen e rendit dhe të qetësisë publike. Inspektorë të policisë ndërtimore u kanë dhënë kohë pronarëve të lokaleve dhe restoranteve që t’i prishin vetë ndërtimet, ndërsa ndërhyrja e fadromës të bëhet vetëm në rastet e nevojshme. Prishja e këtyre ndërtimeve do t’i hapë rrugë infrastrukturës së zonës turistike të Currilave, me qëllim përmirësimin e imazhit të kësaj zone.
Aksioni
Inspektorati i Përgjithshëm Ndërtimor i mbështetur nga policia ndërtimore dhe forcat e rendit të Durrësit, ka nisur prishjen e ndërtimeve në zonën e plazhit të Currilave. Objekt prishjeje janë bërë 7 lokale që shtriheshin përgjatë bregut. Kundërshtimi i pronarëve të këtyre objekteve, të cilët pretendonin se po ushtronin aktivitet të licensuar nga bashkia, për një afat kohor provizor prej tre mujash, ka ndeshur me vendosmërinë e efektivave ndërtimorë, të cilët u janë përgjigjur atyre me ndërhyrjen e fadromës. Aksioni ka qenë i befasishëm, madje për këtë aksion nuk ishte informuar as inspektorati ndërtimor i Durrësit. Inspektorët e drejtorisë së përgjithshme pretendojnë se pronarët janë paralajmëruar në bazë te rregullit, pesë ditë më parë. Pas debateve të njëpasnjëshme mes dërtimorëve dhe pronarëve, këta të fundit kanë nisur të shkatërronin vetë objektet e tyre. Pas këtij aksioni, do të lirohet më shumë se një kilometër plazh, i cili ndodhej në kushte të papërdorshme, për shkak të objekteve që ishin ndërtuar dhe mbeturinat që hidheshin nga këto ndërtime. Shpeshherë, një situatë e tillë ka shkaktuar jo pak indinjatë te banorët e qytetit të Durrësit, të cilët prej vitesh i kanë kaluar ditët e nxehta pikërisht në këtë plazh, i cili ka qenë pronë publike. Ndërsa situata sa vinte e bëhej më e rëndë, aq më tepër kur kjo zonë konsiderohej si një nga perlat turistike, askush nuk merrte masa për të parandaluar fenomenin. Ndërhyrja e inspektoratit ndërtimor të Durrësit ditë më parë, ishte e parezultat, pasi asnjëri nga pronarët e lokaleve nuk lëvizi as edhe një karrigia nga vendi. Situata pati degjeneruar deri në atë masë saqë në këtë pjesë të plazhit, hapësirat për pushuesit ishin tepër të vogla. Kjo kishte çuar në braktisjen pothuajse totale të plazhit, dhe frekuentuesit e vetëm ishin disa prej banorëve që kishin shtëpitë aty pranë, pasi nuk kishin mundësi ekonomike për të shkuar diku tjetër. Gjatë fushatës së fundit elektorale për kreun e bashkisë së Durrësit, që të dy kandidatët e forcave kryesore politike premtuan se sapo të merrnin në drejtim bashkinë, do të shembnin ndërtimet dhe do të evadonin mbeturinat inerte, me qëllim që t’ju kthenin qytetarëve të Durrësit plazhin e grabitur padrejtësisht. Por, në një kohë kur qeveria disponon të gjitha instrumentet ligjorë për c’betonimin e plazhit më të vjetër të Durrësit si dhe për të liruar trojet e pushtuara në mënyrën më të padrejtë të mundshme, askush nuk denjonte të ndërhynte. Aksioni i djeshëm në fakt ka rezultuar një “surprizë” për të gjithë, duke filluar që nga pushteti vendor, inspektorati ndërtimor dhe deri tek pronarët e këtyre objekteve.

http://sot.com.al/index.php?option=content&task=view&id=75169&lang=&mosmsg=Faleminderit+per+voten+tuaj%21